Share on Social Media


ஹைலைட்ஸ்:

  • இந்தியா வரும் புடின், நரேந்திர மோடியுடன் முக்கிய பேச்சு.
  • ரஷ்யாவின் அதி நவீன எஸ் 400 ஏவுகணையும் இந்தியா வருகிறது.
  • டிசம்பர் இறுதிக்குள் ஏவுகணைகள் இந்தியா வந்து சேரும்.


ரஷ்ய அதிபர் விலாடிமிர் புடின் அடுத்த மாதம் இந்தியா வரவுள்ளார். அவரது வருகைக்கு முன்பாகவே, ரஷ்யா நம்முடன் செய்து கொண்ட ஒப்பந்தத்தின்படி அதி நவீன எஸ்-400 ரக ஏவுகணைகளை வழங்கத் திட்டமிட்டுள்ளது.

புடினின் இந்திய வருகையின்போது அவருக்கும், பிரதமர் நரேந்திர மோடிக்கும் இடையே பல்வேறு துறைகள் தொடர்பாக முக்கியமான பேச்சுவார்த்தை நடைபெறவுள்ளது. வர்த்தகம், பாதுகாப்பு, மின்சாரம், அடிப்படைக் கட்டமைப்பு தொடர்பாக பல்வேறு முக்கிய பேச்சுக்கள் இடம் பெறவுள்ளன.

டிசம்பர் 2வது வாரத்தில் புடின் இந்தியா வருவார் என்று தெரிகிறது. மறுபக்கம், ரஷ்யா நமக்கு வழங்க ஒப்புக் கொண்ட எஸ் 400 ரக நடமாடும் ஏவுகணைகளை அதற்கு முன்பாகவே இந்தியாவுக்கு டெலிவரி செய்யவும் திட்டமிட்டுள்ளது.

மோடி – புடின் பேச்சுவார்த்தைக்கு முன்னதாக இரு நாட்டு வெளியுறவு மற்றும் பாதுகாப்புத்துறை அமைச்சர்கள் பேச்சு நடத்தவுள்ளனர். மாஸ்கோவில் இது நடைபெறவுள்ளது. அந்தப் பேச்சின் முடிவுகளின் அடிப்படையில் மோடி- புடின் பேச்சுவார்த்தை அமையும்.

மோடி – புடின் பேச்சுவார்த்தையில் ஆப்கானிஸ்தான் குறித்தும், தலிபான்கள் குறித்தும் முக்கியமாக விவாதிக்கப்படும் என்று தெரிகிறது. ஒரு காலத்தில் ஆப்கானிஸ்தான் விவகாரத்தில் சோவியத் யூனியனின் கை ஓங்கியிருந்தது. அதன் பிறகு அமெரிக்காவின் குறுக்கீடு வந்தது. அமெரிக்கப் படையினர் ஆப்கானிஸ்தானில் நிலை கொண்டிருந்த சமயத்தில், இந்தியா அந்த நாட்டில் பல்வேறு நல உதவிகளையும், திட்டங்களையும் மேற்கொண்டது என்பது நினைவிருக்கலாம். ஆப்கானிஸ்தான் நாட்டு நாடாளுமன்றக் கட்டடமே இந்தியா கட்டிக் கொடுத்ததுதான். இந்த நிலையில் ஆப்கானிஸ்தான் நிலவரம் குறித்து மோடி – புடின் பேசவுள்ளது முக்கியத்துவம் வாய்ந்ததாக அமைந்துள்ளது.

சமீபத்தில் இதுதொடர்பாக இந்தியா – ரஷ்யா இடையே டெல்லியில் ஒரு உச்சி மாநாடு நடந்தது. அதில் ஈரான், கஜகஸ்தான், கிர்கிஸ்தான், தஜிகிஸ்தான், துர்க்மேனிஸ்தான், உஸ்பெகிஸ்தான் ஆகிய நாடுகளின் பாதுகாப்புத்துறை அதிகாரிகளும் கலந்து கொண்டனர் என்பது நினைவிருக்கலாம். இந்த மாநாட்டின்போது எட்டு நாடுகளும் இணைந்து, ஆப்கானிஸ்தான் தீவிரவாதிகளின் சொர்க்கபுரியாக மாறி விடாமல் தடுக்க கூட்டாக செயல்படுவது என்று தீர்மானிக்கப்பட்டது.

புடினின் வருகையின் முக்கியமான அம்சமாக ரஷ்யா நமது நாட்டுக்கு வழங்கவுள்ள எஸ் 400 ஏவுகணைகள்தான் பார்க்கப்படுகிறது. கடந்த 2018ம் ஆண்டு இந்தியா – ரஷ்யா இடையே இதுதொடர்பாக ஒப்பந்தம் கையெழுத்தானது. மொத்தம் 5, எஸ் 400 ஏவுகணை மற்றும் லாஞ்சர்களை இந்தியா பெறவுள்ளது. இது “மொபைல்” ஏவுகணையாகும். தரையிலிருந்து வானில் உள்ள இலக்கை தாக்கக் கூடிய ஏவுகணைகள் லாஞ்சரில் பொருத்தப்பட்டிருக்கும். இந்த ஏவுகணைகளை இந்தியாவுக்கு விற்க டிரம்ப் நிர்வாகம் கடும் ஆட்சேபனை தெரிவித்திருந்தது. ஆனால் ரஷ்யா அதை பொருட்படுத்தவில்லை.

எஸ் 400 ஏவுகணை திட்டமானது, ரஷ்யாவின் அதி நவீன ஏவுகணைத் திட்டமாக கருதப்படுகிறது. அந்த ஏவுகணை நமக்கு கிடைக்கும்போது நமது ராணுவத்தின் பலமும் வெகுவாக அதிகரிக்கும். புடின் வருகைக்கு முன்பாக அல்லது இந்த ஆண்டு இறுதிக்குள் இந்த ஏவுகணைகள் இந்தியா வந்து சேரும் என்று தெரிகிறது.

1990ம் ஆண்டு இந்த ஏவுகணைத் திட்டத்தை ரஷ்யாவின் அல்மாஸ் மத்திய வடிவமைப்பு பிரிவு உருவாக்கியது. ஏற்கனவே இருந்த எஸ் 300 ஏவுகணைகளைத்தான் மாற்றியமைத்து எஸ் 400 ஏவுகணைகளை உருவாக்கினர். 2007ம் ஆண்டு முதல் இது சேவையில் இருந்து வருகிறது. இந்த வகை ஏவுகணைகளை ரஷ்யாவிடமிருந்து முதலில் வாங்கிய நாடு சீனாதான். 2014ம் ஆண்டு இந்த ஏவுகணைகளை சீனா வாங்கியது. அதேசமயம், சவுதி அரேபியா, துருக்கி, பெலாரஸ் ஆகியவையும் இதை வாங்கியுள்ளன. தற்போது இந்தியாவும் இதில் இணைகிறது. உலக அளவில் தற்போது பல்வேறு நாடுகளிடம் உள்ள SAM (Surface to air missiles) வகை ஏவுகணைகளிலேயே சிறந்தது எஸ் 400தான் என்பது குறிப்பிடத்தக்கது.



Source link

Share on Social Media

Leave a Reply

Your email address will not be published. Required fields are marked *