Share on Social Media


ஹைலைட்ஸ்:

  • மாணவிகள் மீண்டும் பள்ளிகளுக்குத் திரும்பி வருகின்றனர்.
  • அரசு ஊழியர்களுக்கு சம்பளம் தர முடியவில்லை என தலிபான்கள் தகவல்.
  • மேலை நாடுகள் ஆப்கான் சொத்துக்களை முடக்கி விட்டதாக குற்றச்சாட்டு.


ஆப்கானிஸ்தான் முழுவதும் உள்ள பள்ளிகளில் படித்து வந்த மாணவிகளில் 75 சதவீதம் பேர் மீண்டும் பள்ளிகளுக்கு வரத் தொடங்கியிருப்பதாக அந்த நாட்டை தற்போது ஆட்சி புரிந்து வரும் தலிபான்கள் தெரிவித்துள்ளனர்.

தலிபான்கள், பெண்கள் படிப்பதற்கு எதிரானவர்கள் என்பதால், ஆப்கானிஸ்தானை அவர்கள் கைப்பற்றியதுமே அந்த நாட்டு பெண்கள் மத்தியில் பதட்டம் தொற்றிக் கொண்டது. இந்த நிலையில் மாணவிகள் பள்ளிக்குத் திரும்பியுள்ளதாக தலிபான்கள் அறிவித்துள்ளனர்.

பாகிஸ்தான் வந்துள்ள தலிபான் ஆட்சியின் தற்காலிக வெளியுறவுத்துறை அமைச்சர் அமிர் கான் முட்டாக்கி, இஸ்லாமாபாத்தில் செய்தியாளர்களிடம் பேசுகையில், ஆப்கானிஸ்தானில் பள்ளிகளுக்கு மாணவிகள் திரும்பத் தொடங்கியுள்ளனர். 75 சதவீதம் மாணவிகள் இதுவரை திரும்பியுள்ளனர்.

ஆப்கானிஸ்தானில் பள்ளி ஆசிரியர்களுக்கு சம்பளம் கொடுக்க முடியாமல் நாங்கள் திணறுகிறோம். ஆப்கானிஸ்தானின் சொத்துக்கள் அனைத்தையும் மேலை நாடுகள் முடக்கி வைத்துள்ளதே இதற்குக் காரணம். அந்த நடவடிக்கையை மேலை நாடுகள் கைவிட வேண்டும்.

ஆப்கானிஸ்தானில் 5 லட்சம் அரசு ஊழியர்கள் உள்ளனர். அவர்களுக்கு சம்பளம் தர வேண்டியுள்ளது. யாரையும் நாங்கள் எந்தக் காரணத்திற்காகவும் வேலையை விட்டு நீக்கவில்லை. எந்தப் பெண் பணியாளரையும் நீக்கவில்லை என்றார் அவர்.

முட்டாக்கி இப்படிக் கூறினாலும் கூட பெண்களை கல்வி நிலையங்களுக்கும், அலுவலகங்களுக்கும் தலிபான் ஆட்சியாளர்கள் அனுமதிக்கவில்லை என்று தகவல்கள் கூறுகின்றன.

தலிபான்கள் கடந்த ஆகஸ்ட் மாதம் ஆட்சியைக் கைப்பற்றியதைத் தொடர்ந்து முதல் வேலையாக பள்ளிகளை மூடினர். செப்டம்பர் 18ம் தேதி முதல் மாணவர்களுக்கு மட்டும் 6 முதல் 12ம் வகுப்பு வரை வகுப்புகள் தொடங்கின. ஆண் ஆசிரியர்கள் மட்டும் பள்ளிக்குச் செல்ல அனுமதிக்கப்பட்டனர்.

சில பள்ளிகளில் 6ம் வகுப்பு வரை மாணவியர் அனுமதிக்கப்படுகின்றனர். ஆனால் உயர் நிலை, மேல்நிலைப் பள்ளிகளில் மாணவியருக்கு அனுமதி இல்லை. இந்த நிலையில்தான் 75 சதவீத மாணவியர் பள்ளிகளுக்குத் திரும்பி விட்டதாக தலிபான்கள் கூறியுள்ளனர்.



Source link

Share on Social Media

Leave a Reply

Your email address will not be published. Required fields are marked *