Share on Social Media


ஹைலைட்ஸ்:

  • போதை மருந்து கடத்தியதாக நாகேந்திரன் 2010ம் ஆண்டு கைது செய்யப்பட்டார்.
  • அவருக்கு சிங்கப்பூர் சட்டப்படி தூக்குத் தண்டனை விதிக்கப்பட்டது.
  • அவர் தாக்கல் செய்த கருணை, அப்பீல் மனுக்கள் நிராகரிக்கப்பட்டு விட்டன.


இந்திய வம்சாவளி தமிழரான நாகேந்திரன் தர்மலிங்கத்தை தூக்கில் போடக் கூடாது என்று சிங்கப்பூர் அரசை வலியுறுத்தி அங்கு போராட்டங்கள் நடந்து வருகின்றன.

மலேசியாவிலிருந்து சிங்கப்பூருக்கு வரும்போது 43 கிராம் ஹெராயின் கடத்தி வந்ததாக கூறி 2010ம் ஆண்டு கைது செய்யப்பட்டார் நாகேந்திரன். அவருக்கு சிங்கப்பூர் கோர்ட் தூக்குத் தண்டனை விதித்தது. தனது தண்டனைக்கு எதிராக பலமுறை அப்பீல் செய்தும் அனைத்தும் நிராகரிக்கப்பட்டன. இந்த நிலையில் தற்போது தூக்குக் கயிற்றை எதிர்நோக்கியிருக்கிறார் நாகேந்திரன் தர்மலிங்கம்.

அவருக்கு தண்டனை தரக் கூடாது. அவர் மன நலம் சரியில்லாதவர். அதை பரிசீலிக்காமல் தண்டனை தரக் கூடாது என்று மலேசியா மற்றும் சிங்கப்பூரில் அவருக்கு ஆதரவாக போராட்டங்கள் நடந்து வருகின்றன.

கடந்த வாரம் அவருக்குத் தூக்குத் தண்டனை நிறைவேற்றப்படவிருந்தது. ஆனால் அவருக்கு கொரோனா தாக்குதல் ஏர்பட்டதைத் தொடர்ந்து தற்போது இந்த தண்டனை தள்ளிப் போடப்பட்டுள்ளது. ஆனால் விரைவிலேயே அவரை தூக்கில் போட்டுவிடுவார்கள் என்ற அச்சம் போராட்டக்காரர்கள் மத்தியில் எழுந்துள்ளது.

அவரது சகோதரி சர்மிளா தர்மலிங்கம் இந்தப் போராட்டங்களை விடாமல் நடத்தி வருகிறார். மலேசியாவில் வசித்து வரும் அவரைப் பார்த்து விட்டு சிங்கப்பூர் திரும்பியபோதுதான் நாகேந்திரன் தர்மலிங்கம் சிக்கிக் கொண்டார் என்பது குறிப்பிடத்தக்கது.

இதுகுறித்து சர்மிளா தர்மலிங்கம் கூறுகையில், எனது தம்பி மன நலம் சரியில்லாதவர். அதை கருத்தில் கொண்டு அவரை மன்னித்து விடுதலை செய்ய வேண்டும். அவருக்கு 2வது சான்ஸ் தர வேண்டும். அவருக்கு மற்றவர்களைப் போன்ற அறிவாற்றல் கிடையாது. எங்களது குடும்பத்தினர் அனைவரும் நாகேந்திரனுக்காக பிரார்த்தனை செய்தபடி உள்ளோம். அற்புதங்களில் எனக்கு நம்பிக்கை உண்டு. எனது தம்பியும் கடவுள் அருளாள் மீண்டு வருவான் என்ற நம்பிக்கையுடன் இருக்கிறோம் என்றார்.

இதற்கிடையே, ஐரோப்பிய யூனியன் மற்றும் இங்கிலாந்தைச் சேர்ந்த மனித உரிமை அமைப்பாளர்களும் நாகேந்திரன் விடுதலைக்காக கையெழுத்து இயக்கம் நடத்தி வருகின்றனர். இதுவரை 85,000 கையெழுத்துக்களை அவர்கள் பெற்றுள்ளனர்.

நாகேந்திரன் கைது செய்யப்பட்டபோது அவருக்கு வயது 21. அவருக்கு மருத்துவப் பரிசோதனை நடத்தப்பட்டபோது அவரது ஐக்யூ 69 என்ற அளவில்தான் இருந்துள்ளது. இது இயல்பான ஐக்யூவை விட மிக மிக குறைவாகும். அறிவுத்திறன் குறைபாடு இது. இதையே காரணமாக வைத்து அவரது சட்டக் குழு தண்டனை விதிக்கக் கூடாது என்று வாதிட்டது. ஆனால் அது நீதிமன்றத்தில் எடுபடவில்லை. அரசும் அவரது கருணை மனுக்களை ஏற்காமல் நிராகரித்தது.

தற்போது கொரோனா வந்த காரணத்தால் நாகேந்திரனின் உயிர் தப்பியுள்ளது. ஆனால் அவருக்கு உடல் நலம் சரியானதும் அவர் தூக்கில் போடப்படுவார் என்ற எதிர்பார்ப்பு வலுத்துள்ளதால், நாகேந்திரன் விவகாரம் சிங்கப்பூரில் சூடு பிடித்துள்ளது.



Source link

Share on Social Media

Leave a Reply

Your email address will not be published. Required fields are marked *