Share on Social Media


சொத்துக் குவிப்பு வழக்கில் சிறை சென்றுள்ள சசிகலா வெளியே வருவதற்கான நாட்களை எண்ணிக் கொண்டிருக்கிறார். இன்னும் சில நாட்களில் அவர் வெளியே வந்துவிடுவார் என்பதால், அவரை சுற்றி தமிழக அரசியல் களம் சுழல ஆரம்பித்துள்ளது. சசிகலா சிறை செல்லும் முன்னர் எடப்பாடி பழனிசாமியை முதல்வர் நாற்காலியில் அமர வைத்து விட்டு சென்றார். ஆனால், அவரது குடும்பத்தையே ஓரம் கட்டி விட்டு ஈபிஎஸ்-ஓபிஎஸ் அணிகள் இணைந்தன.

தொடர்ந்து சசிகலாவை அதிமுகவில் சேர்க்க மாட்டோம் என்றும், அவரை கடுமையாக விமர்சித்தும் வந்த அதிமுகவினர் தற்போது அவருக்கு ஆதரவான கருத்துக்களை தெரிவித்து வருகின்றனர். முன்னதாக, சசிகலாவின் அபிமானிகள் அதிமுகவில் ஏராளம் என்பதாலும், இன்றைக்கு ஏதேனும் பதவியில் இருப்பவர்கள் சசிகலாவின் கண் பார்வை இல்லாமல் அந்த இடத்திற்கு வந்திருக்க முடியாது என்பதாலும், அவர் வருகைக்கு பின்னர் பல்வேறு மாற்றங்கள் அரசியல் களத்தில் நிகழலாம் என்று கூறப்பட்டது.

அதற்கு ஏற்றவகையில், கோகுல இந்திரா, ராஜேந்திர பாலாஜி ஆகியோர் சசிகலாவுக்கு ஆதரவான கருத்துகளை கூறி வருகின்றனர். ஆனால், அதிமுகவில் இருந்துகொண்டு சசிகலாவுக்கு ஜால்ரா அடிப்பதை யாராலும் ஏற்றுக் கொள்ள முடியாது என்று அமைச்சர் ஜெயக்குமார் எச்சரிக்கை விடுத்துள்ளார்.

எடப்பாடி பழனிசாமிக்கு அப்பாயின்ட்மென்ட் தராத மோடி: பாஜகவின் அஜண்டா என்ன?

இந்த நிலையில், துக்ளக் வார இதழின் 51ஆவது ஆண்டு விழா சென்னை கலைவாணர் அரங்கத்தில் நடந்து வருகிறது. அதில், பாஜக தேசியத் தலைவர் ஜே.பி.நட்டா கலந்து கொண்டுள்ளார். நிகழ்ச்சியில் பேசிய துக்ளக் இதழின் ஆசிரியர் குருமூர்த்தி, முதல்வர் பழனிசாமிக்கு ஆளுமை உள்ளது. அது வெளிப்படையாக தெரிகிறது. திமுகவை எதிர்க்க வேண்டுமெனில் சசிகலா போன்றவர்களையும் சேர்த்து கொள்ள வேண்டும் என்று கருத்து தெரிவித்துள்ளார்.

ரஜினி அரசியலில் இருந்து விலகுவதாக அறிவித்துள்ள நிலையில், சட்டமன்ற தேர்தலையொட்டி அதிமுகவை பலப்படுத்தும் நோக்கில் பாஜக இறங்கியுள்ளது. பாஜக, அதிமுக, அமமுகவை ஒன்றிணைக்கும் வேலைகள் நடைபெற்று வருவதாக அரசியல் களத்தில் சலசலக்கப்பட்டு வருகிறது. இந்த நிலையில், ரஜினியின் வருகைக்கு தூபம் போட்டு வந்தவர்களில் ஒருவரும், ரஜினியை எப்படியாவது அரசியலில் இழுத்து விட வேண்டும் என்ற முனைப்புடன் செயல்பட்டவர்களில் ஒருவருமான குருமூர்த்தி, சசிகலாவை இணைத்துக் கொள்ள வேண்டும் என்று பேசியுள்ளார் என்பது கவனிக்கத்தக்கது.



Thanks for the source

Share on Social Media

Leave a Reply

Your email address will not be published. Required fields are marked *