Share on Social Media


ஹைலைட்ஸ்:

  • விண்கோளை திசை திருப்ப டார்ட் விண்கலத்தை ஏவியுள்ளது நாசா.
  • டார்ட் விண்கலம் 10 மாத பயணத்திற்குப் பிறகு டிமார்பாஸை அடையும்.
  • விண்கோள் மீது மோதி அதன் பாதையை திருப்பி விடும் டார்ட் விண்கலம்.

2013ம் ஆண்டு பூமியை நோக்கி மிகப் பெரிய விண்கோள் (ஆஸ்டிராய்ட்) ஒன்று பாய்ந்து வந்தது. அதை ரஷ்யா வானிலேயே வைத்துத் தகர்த்த சம்பவம் உலகையே பரபரப்புக்குள்ளாக்கியது. தற்போது அதேபோன்ற ஒரு வேலையை செய்ய அமெரிக்கா களம் இறங்கியுள்ளது. ஆனால் அமெரிக்கா சற்று வித்தியாசமாக, அந்த விண்கோளுக்கே போய் அதை வேற பக்கமாக திருப்பி விடுவதற்காக ஒரு விண்கலத்தை ஏவியுள்ளது.

உலகின் முதல் விண்கோள் பாதை மாற்ற தொழில்நுட்பத்தை இதற்காக பயன்படுத்துகிறது அமெரிக்கா. அமெரிக்காவின் தனியார் விண்வெளி நிறுவனமான, ஸ்பேஸ்எக்ஸ் நிறுவனத்தின் பால்கன் 9 ராக்கெட் மூலம் டார்ட் (Double Asteroid Redirection Test) விண்கலம் செலுத்தப்பட்டது. இந்த விண்கலமானது கிட்டத்தட்ட 10 மாத காலம் பயணம் செய்து டிமார்பாஸ் என்ற விண்கோளை சென்றடையும். அதன் பின்னர் அந்த விண்கோள் மீது மோதி அதன் பாதையை மாற்றி விடும்.

ஏன் டிமார்பாஸ் விண்கோளை நோக்கி இந்த விண்கலம் செலுத்தப்படுகிறது?

டைடிமாஸ் என்று ஒரு பெரிய விண்கோள் உள்ளது. இதன் சுற்றளவு கிட்டத்தட்ட 2500 அடியாகும். பூமிக்கு எப்படி நிலா இருக்கிறதோ, அதே மாதிரி இந்த டைடிமாஸின் நிலவாக இருப்பதுதான் இந்த டிமார்பாஸ் விண்கோள். சிறிய விண்கோள் இது. 2003ம் ஆண்டுதான் இதைக் கண்டுபிடித்தனர். முதலில் இதற்கு எஸ் S/2003 (65803) என்று பெயர் சூட்டினர். பின்னர் டைடிமாஸ் பி என்று மாற்றினர். டைடி மூன் என்றும் ஒரு பெயர் சூட்டப்பட்டது. பிறகுதான் இதை டிமார்பஸ் என்று 2020ம் ஆண்டு பெயர் மாற்றினர்.

சுமார் 560 அடி சுற்றளவு கொண்ட விண்கோளாகும் இது. குட்டி சைஸில் உள்ள இந்த விண்கோளைத்தான் நாசா தனது ஆய்வுக்கு எடுத்துக் கொண்டது. இந்த விண்கோளுக்கு ஒரு விண்கலத்தை ஏவி அந்த விண்கோள் மீது மோதி அதன் பாதையை திசை திருப்புவதே இந்த திட்டத்தின் நோக்கமாகும்.

டைடிமாஸ் விண்கோளிலிருந்து 525 அடி தள்ளிப் போய் டிமார்பஸ் விண்கோள் சுற்றும் வகையில் அதை திசை திருப்பி விட நாசா திட்டமிட்டுள்ளது. அந்தப் பணியைத்தான் டார்ட் விண்கலம் செய்யப் போகிறது. டைடிமாஸும், டிமார்பஸும் ஒரே நேரத்தில் ஒரே வேகத்தில் சுற்றும் இயல்பைக் கொண்டவையாகும். இந்த விண்கோள்கள் பூமியிலிருந்து 11 மில்லியன் கிலோமீட்டர் தூரத்தில் உள்ளன என்பது குறிப்பிடத்தக்கது.

நாசாவின் இந்த புதிய முயற்சி வெற்றி பெற்றால், எதிர்காலத்தில் பூமிக்கு ஆபத்தை ஏற்படுத்தக் கூடியவை என்று கணிக்கப்படும் விண் கோள்களை அங்கேயே போய் விண்கலத்தைக் கொண்டு மோதி, வேறு பாதையில் திருப்பி விட முடியும். இதனால் விண் கோள்களால் பூமிக்கு வரும் ஆபத்துகளும் முழுமையாக நீங்க வாய்ப்பு ஏற்படும். இப்படிப்பட்ட விண்கோள்கள் பூமியைத் தாக்கித்தான் டினோசர் இனமே அழிந்தது என்பது நினைவிருக்கலாம். எனவே அப்படிப்பட்ட ஆபத்து மனிதர்களுக்கு நேராமல் தடுக்கவே நாசா இந்த புதிய முயற்சியில் இறங்கியுள்ளது.

330 மில்லியன் டாலர் செலவில் இந்த திட்டத்தை நாசா செயல்படுத்துகிறது. டார்ட் விண்கலமானது மணிக்கு 15,000 மைல்கள் என்ற வேகத்தில் செல்லக் கூடியது. 1344 பவுன்டு எடையுடன் கூடிய இந்த விண்கலமானது, 59 அடி சுற்றளவைக் கொண்டது. நேராக போய் டிமார்பஸ் மீது மோதக் கூடிய வகையில் இதை செலுத்தியுள்ளனர்.

இது மோதிய வேகத்தில் விண்கோள் எந்த அளவுக்கு நகர்ந்துள்ளது என்பதை பூமியில் உள்ள தொலைநோக்கிகள் மூலமாக கண்காணிக்க உள்ளனர்.

விண்வெளியில் தற்போது 460 அடி சுற்றளவு கொண்ட கிட்டத்தட்ட 10,000 விண்கோள்கள் சுற்றிக் கொண்டுள்ளன. ஆனால் அடுத்த 100 ஆண்டுகளுக்கு இவை எதுவுமே பூமியை நோக்கி வரும் வாய்ப்பு இல்லை என்று நாசா தெரிவித்துள்ளது. அதேபோல, 66 மில்லியன் ஆண்டுகளுக்கு முன்பு பூமியைத் தாக்கி டினோசர் இனத்தையே அழித்த பெரிச சைஸ் விண்கோள்கள் பூமியைத் தாக்க 100 முதல் 200 மில்லியன் ஆண்டுகள் வரை எடுத்துக் கொள்ளும் என்பதால் இப்போதைக்கு பூமிக்கு எந்த ஆபத்தும் இல்லை என்றும் நாசா விளக்கியுள்ளது.

அப்பறம் என்னப்பா.. கவலையை விடுங்க, மார்க்கெட்டுக்குப் போய் தக்காளி விலை எப்படி இருக்குன்னு பார்த்துட்டு வருவோம், வாங்க!!



Source link

Share on Social Media

Leave a Reply

Your email address will not be published. Required fields are marked *