Share on Social Media


உங்கள் தனிப்பட்ட இலக்கு என்னவாக வேண்டுமானாலும் இருக்கட்டும், இந்த தேசத்தின் இலக்கு பற்றி கொஞ்சம் யோசிப்போம். பொருளாதார நோக்கில், அரசியல் நோக்கில், சமூக நோக்கில் என இந்தியாவுக்குப் பலவிதமான இலக்குகள் இருக்கலாம் என்றாலும், மனநலம் சார்ந்த இலக்கை மட்டும் இப்போது நாம் கவனத்தில் எடுத்துக்கொள்வோம். அடுத்த பத்தாண்டுகளில் மனநலனுக்கான இலக்கை அடைய இந்தியா என்ன செய்ய வேண்டும் என்று பார்க்கலாம். இதில் நம்முடைய பங்கு என்ன என்றும் யோசிப்போம்.
மனநலனுக்கான இலக்கு என்ன என்பதைப் பார்ப்பதற்கு முன், இதற்கான பின்னணியைப் பார்ப்பது அவசியம். அப்போதுதான் மனநலனுக்கான இலக்கையும் அதில் உலகமும் நம் நாடும் எந்த அளவுக்குப் பின்தங்கியிருக்கின்றன என்பதையும் புரிந்துகொள்ள முடியும்.

உடல் நலம்போல மனநலமும் முக்கியம் என்பதை நீங்கள் உணந்திருக்கலாம். உடல் நலம் காக்க மருத்துவமனைகளும், சுகாதார நிலையங்களும் இருக்கின்றன. இதில் நிறைகுறைகள் இருக்கின்றன என்றாலும், மனநலம் என்று வரும்போது நம்முடைய கட்டமைப்பில் போதாமைகள் அதிகம் இருக்கின்றன.
மனநலம் என்பதைப் பெரும்பாலும் மனநல மருத்துவமனைகள் அல்லது மனநல காப்பகங்கள் சார்ந்ததாக மட்டுமே பார்க்கிறோம். இதிலும்கூடச் சமூகம் சார்ந்த ஒவ்வாமை இருக்கிறது. தயக்கமும் சமூக விலக்கலின் அச்சமும் இல்லாமல் மனநலத்தை நாடுவது என்பது சிக்கலானதாகவே அமைகிறது.

மனநலம் பேணுவதன் அவசியத்தை உணர்வதும், ஏதேனும் காரணத்தால் மனம் சார்ந்த பிரச்சனைகள் இருந்தால் அதற்கான ஆலோசனையை நாடுவதும் ஆரோக்கியமான சமூகத்திற்கு மிகவும் அவசியமாகும். இதைக் கருத்தில் கொண்டே, உலக சுகாதார நிறுவனம், மனநலனுக்கான விரிவான செயல் திட்டத்தை 2013ஆம் ஆண்டில் வகுத்தது.

மனநலனுக்கான செயல்திறன் வாய்ந்த தலைமை, நிர்வாகம்,. சமூகம் சார்ந்த சூழலில் மனநலச் சேவைகளை அளிப்பது, மனநல விழிப்புணர்வு, தகவல் அமைப்பை வலுவாக்குவது உள்ளிட்ட பல்வேறு இலக்குகள் இந்தச் செயல்திட்டத்தில் குறிப்பிடப்பட்டுள்ளன.

இலக்குகளை அடைந்துவிட்டோமா?

மனநலனுக்கான இந்த நோக்கங்களை அடைய 2020ஆம் ஆண்டு இலக்காக நிர்ணயிக்கப்பட்டிருந்தது. இந்நிலையில், உலக சுகாதார அமைப்பு வெளியிட்டுள்ள மனநல வழிகாட்டி (Mental Health Atlas), இந்த இலக்குகளை அடைவதில் உலக நாடுகள் எந்த அளவுக்கு முன்னேறியிருக்கின்றன என்பதை சுட்டிக்காட்டும் வகையில் அமைந்துள்ளது.

மனநல இலக்குகளை அடைவதில் பெருமளவில் ஏமாற்றமே நிலவுவதை இந்த வழிகாட்டி அறிக்கை சுட்டிக்காட்டுகிறது (https://www.who.int/publications/i/item/9789240036703). உலகின் 171 நாடுகளுடைய மனநல திட்டங்கள் சார்ந்த தரவுகளைக் கொண்டுள்ள இந்த அறிக்கை, மனநலம் சார்பாக அண்மைக் காலமாக அளிக்கப்படும் முக்கியத்துவம் தேவைக்கேற்ப மனநல வசதிகளை அதிகரிப்பதில் வெளிப்படவில்லை எனத் தெரிவிக்கிறது.

இதன் பொருள் மனநலன் தொடர்பான ஆலோசனைகள் அல்லது தீர்வுகளைப் பெறுவதற்கான கட்டமைப்பு சமூக அளவில் விரிவடையவில்லை என்பதுதான். இதுவே கவலை தரும் விஷயம் எனும் நிலையில், அறிக்கையில் குறிப்பிடப்பட்டுள்ள மற்ற விஷயங்களைப் பார்க்கலாம், மூன்று ஆண்டுகளுக்கு ஒரு முறை வெளியிடப்படும் இந்த அறிக்கை, மனநலம் தொடர்பாகப் பல்வேறு நாடுகளில் நிறைவேற்றப்படும் சட்டங்கள், மேற்கொள்ளப்படும் திட்டங்கள், நிதி வசதி, மனித வள வசதி உள்ளிட்ட அம்சங்களை அடிப்படையாகக் கொண்டு அமைகிறது.

Mental Health Atlas

புதிய சவால்கள்

கோவிட்-19 வைரஸ் உலக நாடுகளை உலுக்கி, நம்முடைய பொருளாதார, மருத்துவக் கட்டமைப்பின் போதாமைகளையும் இடைவெளிகளையும் உணர்த்திய நிலையில், மனநலம் சார்ந்த பிரச்சனைகளுக்குத் தீர்வு காண்பதில் உள்ள போதாமைகள் பல மடங்கு அதிகரித்திருப்பதையும் உணர முடிகிறது.
கோவிட்-19 பெருந்தொற்று மனநலச் சேவைகளுக்கான முக்கியத்துவத்தை தீவிரமாக உணர்த்திய நிலையிலும், நல்லெண்ணத் திட்டங்கள் நடைமுறையில் நிதி வசதி பெறவில்லை என்பதை உணர்த்தியிருப்பது வேதனையானது என உலக சுகாதார அமைப்பின் தலைவர் ஜெப்ரேயேசஸ் கூறியுள்ளார்.
மனநலச் சேவைகள் தொடர்பான இலக்குகளை நாடுகள் தவறவிட்டிருப்பதை உணர்த்தும் இந்த அறிக்கை, சர்வதேச, உள்ளூர் மனித உரிமை நெறிமுறைகளுக்கு ஏற்ப 51 சதவீத நாடுகளிலேயே மனநலக் கொள்கை அமைந்திருப்பதாக தெரிவிக்கிறது. இதற்கான இலக்கு 80 சதவீதம். அதேபோல 52 சதவீத நாடுகளே மனநல விழிப்புணர்வு, தடுப்பு நடவடிக்கைகளை விரிவாக மேற்கொண்டுள்ளன.

ஆறுதல் அளிக்கும் ஒரே விஷயம் என்னவெனில், தற்கொலை எண்ணிக்கையை 10 சதவீதமாகக் குறைப்பது எனும் இலக்கு மட்டும் எட்டப்பட்டிருப்பதுதான். மனநலனுக்கான அரசு நிதி ஒதுக்கீடு என்பது 2 சதவீதத்திற்கும் குறைவாகவே இருக்கிறது. நிதி வசதி அளிக்கப்பட்ட நாடுகளில்கூட, மனித வள ஒதுக்கீடு போதுமானதாக இல்லை. அரசு நிதி ஒதுக்கீடு நிறுவனமயமாக்கப்படுவதை நீக்க வேண்டும் என்பதையும் அறிக்கை சுட்டிக்காட்டுகிறது.

மையமாக்கப்பட்ட மனநல மருத்துவமனைகள் அதிக நிதி பெறுவது மாறி மனநலச் சேவைகள் சமூக அளவில் பரவலாக்கப்பட வேண்டும் என வலியுறுத்தப்படுகிறது. மனநலச் சேவைகள் தொடரான வருத்தம் தரும் செய்திகளை இந்த அறிக்கை கொண்டிருந்தாலும் மிகுந்த நம்பிக்கையோடு, மனநலச் சேவைகள் தொடர்பான இலக்கை நிறைவேற்றும் இலக்கை மேலும் 10 ஆண்டுகளுக்கு நீட்டித்துள்ளது.
இலக்கை நீட்டித்துப் புதிய இலக்குகளைச் சேர்த்துள்ள இந்நிலையில், இன்னும் தீவிரம் காட்டினால் 2030இல் மனநல இலக்குகளை அடையலாம் என தெரிவிக்கப்பட்டுள்ளது. இந்தியாவும் இந்த இலக்கை அடையத் தேவையான திட்டங்களை வகுத்துச் செயல்படுத்துவதில் கவனம் செலுத்த வேண்டும்.

மனநலச் சேவைகளுக்கு அரசும், சமூகமும் கூடுதல் முக்கியத்துவம் தர வைப்பதில் ஒவ்வொருவருக்கும் பங்கு இருக்கிறது. ஆரோக்கியமான சமூகத்தை உருவாக்க நம்மால் இயன்றதை செய்வோம்.



Source link

Share on Social Media

Leave a Reply

Your email address will not be published. Required fields are marked *