Share on Social Media


ஹைலைட்ஸ்:

  • ஒரு மணி நேரத்திற்கு 8 டாலர் வாடகைக்கு கொடுத்துள்ளார்.
  • வாடகைக்கு அமர்த்தப்பட்ட பெண்ணால் வேலையில் திறன் கூடியதாம்.
  • இவரது இந்த செயலுக்கு எலான் மஸ்க் பாராட்டு தெரிவித்துள்ளார்.


இந்திய அமெரிக்கரான மனீஷ் சேத்தி செய்துள்ள செயல்தான் இன்று சமூக வலைதளங்களில் வைரலாகியுள்ளது. பேஸ்புக் பார்ப்பதிலிருந்து தப்பிக்க, ஆள் வைத்து தன்னை அடிக்க அவரே ஏற்பாடு செய்துள்ள சுவாரஸ்யமான சம்பவம் வைரலாகியுள்ளது.

பேஸ்புக், வாட்ஸ் ஆப் பார்க்காவிட்டால் அந்த நாள் நாளாகவே இருக்காது பலருக்கும். அப்படி “அடிக்ட்”
ஆகிக் கிடக்கிறது சமூகம். இந்த நிலையில் அமெரிக்காவில் வசித்து வரும் இந்திய வம்சாவளியைச் சேர்ந்த மனீஷ் சேத்தி தனது தொழிலில் சிறந்து விளங்க சூப்பராக ஒரு ஐடியா செய்தார்.

பாவ்லோக் என்ற நிறுவனத்தை சேத்தி நடத்தி வருகிறார். இந்த நிறுவனத்தை திறம்பட எப்படி நடத்துவது, எப்படி லாபம் ஈட்டுவது என்று யோசித்தபோதுதான் தேவையில்லாமல் பேஸ்புக் பார்ப்பது உள்ளிட்ட வேலைகளை செய்வதில்தான் வேலைத்திறன் குறைவதாக அவர் உணர்ந்தார். சரி இதை எப்படி சரி செய்யலாம் என்று யோசித்தபோதுதான் அவருக்கு வித்தியாசமான ஒரு ஐடியா வந்தது.

இதையடுத்து கிரெய்க்லிஸ்ட் என்ற நிறுவனத்திலிருந்து காரா என்ற பெண்ணை வாடகைக்கு அமர்த்தினார். அவரது வேலை என்னவென்றால், சேத்தி பக்கத்திலேயே அவர் அமர்ந்து கொள்ள வேண்டும். சேத்தி எப்போதெல்லாம் பேஸ்புக் பக்கம் போகிறாரோ அப்போதெல்லாம் காரா, சேத்தி கன்னத்தில் பளார்னு ஒரு அறை விடுவார். இதுதான் அவரது வேலை, இதுக்கு அவருக்கு சம்பளம் கொடுத்துள்ளார் சேத்தி.

இதெல்லாம் நடந்தது இப்போது அல்லவாம், 2012ம் ஆண்டு தனது நிறுவனத்தை ஆரம்பித்தபோது இதைச் செய்துள்ளார் சேத்தி. என்ன ஆச்சரியம் பாருங்க.. காரா வருவதற்கு முன்பு இருந்ததை விட அவர் வந்த பிறகு பாவ்லோக் நிறுவனத்தின் உற்பத்தி அதிகரித்து விட்டதாம். அதாவது பேஸ்புக் பார்ப்பதை சேத்தி விட ஆரம்பித்த பிறகு அவரது வேலையில் கவனம் அதிகரித்து, அவரது நிறுவனத்திற்கு அது லாபமாக அமைந்துள்ளது.

இப்படி சேத்தியை கன்னத்தில் அறைவதற்காக காராவுக்கு சேத்தி கொடுத்த சம்பளம் எவ்வளவு தெரியுமா.. ஒரு மணி நேரத்திற்கு 8 டாலர். இந்த சம்பவம் இப்போது வைரலாகி பரவியதைத் தொடர்ந்து, தனது பழைய கதையை பலரும் இப்போது பேசுவது குறித்து சேத்தி மகிழ்ச்சி தெரிவித்துள்ளார். காரா வந்த பிறகு தனது நிறுவனத்தின் உற்பத்தித் திறன் 98 சதவீதம் அதிகரித்ததாகவும் அவர் கூறியுள்ளார்.

இதுதொடர்பாக அவர் போட்ட ட்வீட்டைப் பார்த்த டெஸ்லா சிஇஓ எலான் மஸ்க், “தீ” ஸ்மைலி போட்டு பாராட்டியுள்ளார். பேசாம நாமளும் இதுபோல ஆள் வைத்துக் கொண்டு வேலை பார்த்தால் நிறைய லாபம் இருக்கும் போலயே என்று பலரும் இதைப் பார்த்து நினைக்கத் தொடங்கியிருப்பார்கள்.. குறிப்பாக இந்தியாவில்!



Source link

Share on Social Media

Leave a Reply

Your email address will not be published. Required fields are marked *