Share on Social Media


ஹைலைட்ஸ்:

  • மருத்துவப் பரிசோதனைக்காக அதிபர் பைடன் மருத்துவமனையில் அனுமதி.
  • அந்த காலகட்டத்தில் அதிபர் பதவியை வகித்துள்ளார் கமலா ஹாரிஸ்.
  • ஒரு பெண்ணிடம் அதிபரின் அதிகாரங்கள் வழங்கப்பட்டது இதுவே முதல் முறையாகும்.

அமெரிக்க அதிபர் பதவியை ஒரு மணி நேரம் 25 நிமிடங்களுக்கு வகித்துள்ளார் துணை அதிபர் கமலா ஹாரிஸ். இந்த குறுகிய காலம் அவரது பெயரை வரலாற்றுப் புத்தகத்தில் இடம் பெற வைத்துள்ளது.

இதுவரை எந்தப் பெண்ணும் அமெரிக்க அதிபராக இருந்ததில்லை. ஆனால் கிட்டத்தட்ட ஒன்றரை மணி நேரம் அதிபர் பதவியை வகித்து புதிய சரித்திரம் படைத்து விட்டார் கமலா ஹாரிஸ். அதிபரின் அதிகாரங்களை பெற்ற முதல் பெண் என்ற பெருமையும் அவருக்குக் கிடைத்துள்ளது.

நேற்று காலை 10.10 மணி முதல் 11.35 மணி வரை அமெரிக்க அதிபரின் அதிகாரங்கள் கமலா ஹாரிஸிடம் ஒப்படைக்கப்பட்டிருந்தன. அதிபர் ஜோ பைடன் மருத்துவமனையில் அனுமதிக்கப்பட்டிருந்த காரணத்தால் இந்த அதிகார மாற்றம் நடந்துள்ளது.

முன்னதாக வாஷிங்டனில் உள்ள மருத்துவமனையில் வழக்கமான மருத்துவப் பரிசோதனைகளுக்காக அனுமதிக்கப்பட்டார் ஜோ பைடன். அவருக்கு கலோனஸ்கோப்பி பரிசோதனை செய்யப்பட்டது. இந்த நேரத்தில் அவருக்கு அனஸ்தீஸியா கொடுக்கப்பட்டது. அந்த சமயத்தில்தான் அதிபர் பதவியில் இருந்துள்ளார் கமலா ஹாரிஸ்.

அந்த பரிசோதனை முடிந்ததும் மீண்டும் பைடன் வசம் அதிகாரங்கள் திரும்பி விட்டன. மருத்துவப் பரிசோதனைக்குப் பின்னர் கமலா ஹாரிஸைத் தொடர்பு கொண்டு பேசினார் பைடன். குறுகிய காலம் என்றாலும் கூட அமெரிக்க அரசியல் வரலாற்றில் அதிபரின் அதிகாரங்களைப் பெற்ற முதல் பெண், முதல் அமெரிக்க இந்தியர், முதல் தெற்காசிய பெண், முதல் கருப்பர் இனத்தவர் என்று பல பெருமைகளைப் பெற்று விட்டார் கமலா ஹாரிஸ்.

இதற்கு முன்பு ஜார்ஜ் புஷ் அதிபராக இருந்தபோதும் 2002 மற்றும் 2007 ஆகிய இரு ஆண்டுகளில் இதுபோல குறுகிய காலத்திற்கு துணை அதிபரிடம் அதிபரின் அதிகாரங்கள் வழங்கப்பட்டிருந்தன. அதிபருக்கு உடல் நலம் சரியில்லாவிட்டால் துணை அதிபரிடம் அவரது அதிகாரங்கள் ஒப்படைக்கப்பட வேண்டும் என்பது மரபாகும்.

78 வயதாகும் பைடனுக்கு உடல் நலனில் பெரிய பிரச்சினை இல்லை. கடைசியாக அவருக்கு 2019ம் ஆண்டு முழு உடல் நல பரிசோதனை நடத்தப்பட்டது. அப்போது அவர் நல்ல நலமுடன் இருப்பதாக தெரிய வந்தது. இன்று பைடனுக்கு 79வது பிறந்த நாளாகும் என்பது குறிப்பிடத்தக்கது. அமெரிக்க வரலாற்றில் மிகவும் வயதான அதிபர் பைடன் என்பது நினைவிருக்கலாம்.



Source link

Share on Social Media

Leave a Reply

Your email address will not be published. Required fields are marked *