Share on Social Media


ஹைலைட்ஸ்:

  • கொரோனா கட்டுப்பாடுகளை மீறியதாக சர்ச்சை.
  • வேண்டும் என்றே செய்யவில்லை என்று பிரதமர் மரீன் விளக்கம்.
  • மக்களிடம் மன்னிப்பு கேட்பதாகவும் மரீன் அறிவிப்பு.

பின்லாந்து நாட்டு பிரதமர் சன்னா மரீன், கொரோனா கட்டுப்பாடுகளை மறந்து விடிய விடிய பார்ட்டியில் கலந்து கொண்டு பெரும் சர்ச்சையில் சிக்கியுள்ளார். ஊரே கூடி கண்டித்ததால் இப்போது பகிரங்க மன்னிப்பு கேட்டுள்ளார் மரீன்.

36 வயதேயாகும் மரீன்தான் பின்லாந்து நாட்டின் பிரதமராக இருக்கிறார். இவர் தற்போது புதிய சர்ச்சையில் சிக்கியுள்ளார். பின்லாந்து நாட்டு வெளியுறவு அமைச்சர் பெக்கா ஹவிஸ்டாவுக்கு கொரோனா பாசிட்டிவ் ஆகி தனிமைப்படுத்தப்பட்டுள்ளார். சக அமைச்சர்கள் கவனமாக இருக்குமாறு கேட்டுக் கொள்ளப்பட்டிருந்தது. இந்த நிலையில் இரவு பார்ட்டிக்குப் போய் பஞ்சாயத்தைக் கூட்டியுள்ளார் பிரதமர் மரீன்.

தலைநகர் ஹெல்சிங்கியில் உள்ள நைட் கிளப்புக்கு சனிக்கிழமை இரவு போயுள்ளார் மரீன். அவருடன் அவரது கணவர் உள்ளிட்டோரும் சென்றுள்ளனர். அங்கு இரவு முழுவதும் விடிய விடிய பார்ட்டி செய்துள்ளனர். அதிகாலை 4 மணி வரை பார்ட்டி நடந்துள்ளது. இதுதொடர்பான புகைப்படங்கள் வெளியாகி பெரும் சர்ச்சையைக் கிளப்பின. கொரோனா கட்டுப்பாடுகளை பிரதமரே காற்றில் பறக்க விட்டது நியாயமா என்று விமர்சனங்கள் எழுந்துள்ளன.

இதையடுத்து தற்போது பகிரங்கமாக மன்னிப்பு கேட்டுள்ளார் மரீன். இதுகுறித்து அவர் வெளியிட்டுள்ள விளக்கத்தில், நானும் எனது கணவரும் சாப்பிடுவதற்காக வெளியில் போயிருந்தோம். அப்படியே ஷாப்பிங் போனோம். நண்பர்களைச் சந்தித்தோம். நைட் கிளப்பில் கொஞ்ச நேரம் செலவழித்தோம்.

கொரோனா பாசிட்டிவ் உள்ள நபருடன் நான் எக்ஸ்போஸ் ஆகியிருந்தாலும் கூட எனக்கு தனிமைப்படுத்தல் தேவைப்படவில்லை என்று ஒரு அதிகாரி கூறியிருந்தார். அதனால்தான் நான் பார்ட்டியில் கலந்து கொண்டேன். ஆனால் விதிகளை மீறிய செயல் இது என்று உணர்ந்துள்ளேன். இதற்காக அனைவரிடமும் மன்னிப்பு கேட்டுக் கொள்கிறேன், ஸாரி என்று கூறியுள்ளார்.

மரீனுடைய செயலுக்கு பின்லாந்து நாட்டில் கடும் எதிர்ப்பு கிளம்பி விட்டது. இதுதொடர்பாக டிவி சானல்களில் கருத்துக் கணிப்புகள் நடத்தப்பட்டதில், மூன்றில் இரண்டு பங்கு பேர் மரீனுடைய செயல் மிகப் பெரிய தவறு என்று கூறினர். எதிர்க்கட்சிகளும் மரீனை விளாசித் தள்ளி விட்டன. பிரதமரே இப்படி விதிகளை மீறுவது தவறு என்று அவர்கள் விமர்சித்துள்ளனர்.

இப்படி நாடே அல்லோகல்லப்பட்டாலும் கூட ஐரோப்பாவிலேயே மிகவும் குறைந்த அளவு கொரோனா பாதிப்பு இருப்பது பின்லாந்தில்தான். 50 லட்சம் பேர் வசிக்கும் இந்த நாட்டில் இதுவரை மொத்தமே 1384 பேர்தான் இறந்துள்ளனர். 1 லட்சத்து 96 ஆயிரம் பேருக்கு பாதிப்பு ஏற்பட்டுள்ளது. கடந்த சில நாட்களாக பாதிப்பு உயர்ந்து வருகிறது. புதிய கேஸ்களின் எண்ணிக்கை 1 லட்சம் பேருக்கு 308 என்ற அளவில் உள்ளதாக தெரிவிக்கப்பட்டுள்ளது.

2019ம் ஆண்டுதான் பிரதமர் பதவிக்கு வந்தார் மரீன். உலகிலேயே மிகவும் இளவயதுப் பிரதமர் இவர்தான். இவர் பார்ட்டிக்குப் போய் சர்ச்சையில் சிக்குவது இது முதல் முறையல்ல. இதற்கு முன்பும் கூட இவரது வீட்டில் அடிக்கடி பார்ட்டி நடக்கும். அவை சிக்கலாகும். விதம் விதமான பேஷன் உடைகளில் நண்பர்களுடன் போஸ் கொடுத்து சிக்கிக் கொண்டவர் இவர்.

இதுகுறித்து அவர் விளக்குகையில், எனக்கு வயதாகி விடவில்லை. நான் இளம் தலைமுறையின் பிரதிநிதி. நான் இப்படி இருப்பதை விரும்புகிறேன், அதை மறைக்க விரும்பவில்லை என்று கூறியிருந்தார். தற்போது பார்ட்டிக்குப் போய் சிக்கியுள்ள பின்லாந்து பிரதமரை எலான் மஸ்க்கும் நக்கலடித்துள்ளார். இதுதொடர்பாக அவர் ஒரு மீம் போட்டு டிவீட் அடித்துள்ளார். அதற்கு கமெண்ட்டுகள் வந்து குவிந்து கொண்டுள்ளன.



Source link

Share on Social Media

Leave a Reply

Your email address will not be published.