Share on Social Media


தமிழகத்தில் சிபிஎஸ்இ உட்பட அனைத்து 12ம் வகுப்பு பொதுத்தேர்வுகளும் இந்தாண்டு ரத்து செய்யப்பட்டுள்ளது. இந்நிலையில், உயர் கல்விக்கு விண்ணப்பிக்கும் மாணவர்களுக்கு நீட் உள்ளிட்ட நுழைவு தேர்வுகள் நடைபெறுமா என்ற குழப்பம் ஏற்பட்டுள்ளது.

தமிழகத்தில் நீட் தேர்வு ரத்து செய்யப்படும் என்று திமுக தனது தேர்தல் அறிக்கையில் கூறியிருந்ததன்படி, விரைவில் அதற்கான நடவடிக்கையை எடுத்து இந்தாண்டு முதல் நீட்டிலிருந்து விலக்களிக்க வேண்டும் என்ற எதிர்பார்ப்பு பரவலாக எழுந்துள்ளது.

இதனிடையே, நீட்டின் தாக்கத்தை குறித்து ஆராய்ந்து அறிக்கையை தாக்கல் செய்யும் வகையில் ஓய்வு பெற்ற நீதிபதி ஏ.கே. ராஜன் தலைமையில் தமிழக அரசு உயர்நிலைக் குழு ஒன்றை அமைத்துள்ளது. இதற்கு மத்தியில் செய்தியாளர்கள் சந்திப்பில் பேசிய சுகாதாரத்துறை அமைச்சர் மா. சுப்ரமணியன், ”நீட் தேர்வு பாதிப்புகளை குறித்து ஆய்வு செய்து அறிக்கையை தாக்கல் செய்ய ஆணையம் அமைக்கப்பட்டுள்ளது. அந்த ஆணையம் அறிக்கையை தாக்கல் செய்ததும் மேற்படி நடவடிக்கை எடுக்கப்படும். இதுவரை நீட் தேர்வு முறை நடைமுறையில்தான் உள்ளது.

அதற்கான பயிற்சிகளை எடுத்துக்கொள்வது மாணவர்களின் கடைமை” என இவ்வாறு அவர் கூறினார். இதனை விமர்சித்து பேசிய ஓ. பன்னீர்செல்வம், அரசுப்பள்ளிகளில் நீட் தேர்வுக்கு பயிற்சி அளிப்பது மாணவர்கள் மனதில் தேவையற்ற குழப்பத்தை ஏற்படுத்தும் என கூறினார்.

ஊரடங்கு நீட்டிப்பு: அரசு, தனியார் அலுவலக பணியாளர்களுக்கான அறிவிப்பு என்ன?

இந்நிலையில், இதுதொடர்பாக அமமுக பொதுச்செயலாளர் டிடிவி தினகரன் தமது ட்விட்டர் பக்கத்தில், ” தி.மு.க தேர்தல் அறிக்கையில் வாக்குறுதி அளித்ததை போல, நாளை தொடங்கவிருக்கும் தமிழக சட்டப்பேரவையின் முதல் கூட்டத் தொடரிலேயே ‘நீட்’ தேர்வுக்கு எதிரான மசோதாவை நிறைவேற்றி குடியரசுத்தலைவரின் ஒப்புதலைப் பெற வேண்டும் என வலியுறுத்துகிறேன். இதன் மூலம், 2010ஆம் ஆண்டு மத்திய அரசில் தி.மு.க அங்கம் வகித்த போது ஏழை,எளிய கிராமப்புற மாணவர்களின் ‘டாக்டர்’ கனவை சிதைக்கும் ‘ நீட்’ தேர்வை கொண்டுவந்த தவறுக்கு பிராயசித்தம் தேடிக்கொள்ள தற்போது கிடைத்திருக்கும் நல்லதொரு வாய்ப்பை பயன்படுத்திட வேண்டும்” என இவ்வாறு அதில் கூறியுள்ளார்.

முன்னதாக நடிகர் சூர்யா வெளியிட்ட அறிக்கையில், ” 12 ஆண்டு பள்ளிக்கல்வி பயின்ற பிறகும் நுழைவுத் தேர்வு மூலமாகவே உயர் கல்விக்கு செல்ல முடியும் என்பது சமூக அநீதி என்றும், கல்வி மாநில உரிமை என்கிற கொள்கையில் அனைத்து அரசியல் கட்சிகளும் ஒன்றிணைந்து செயல்பட வேண்டுமெனவும் வலியுறுத்தியுள்ளார்.



Thanks for the source

Share on Social Media

Leave a Reply

Your email address will not be published. Required fields are marked *