Share on Social Media


ஹைலைட்ஸ்:

  • அமெரிக்காவில் 6 மாகாணங்களில் மோசமான சூறாவளித் தாக்குதல்.
  • சூறாவளித் தாக்குதலில் 90 பேர் பலி.
  • இதுபோன்ற சூறாவளிகள் அடிக்கடி ஏற்படும் என நிபுணர்கள் எச்சரிக்கை.

உலகம் முழுவதும் வானிலை மாற்றத்தால் மாபெரும் இயற்கைச் சீற்றங்கள் இனி அடிக்கடி ஏற்படும் என்று அமெரிக்க அவசர கால நிர்வாக முகமையின் தலைவர் டீன் கிறிஸ்வெல் கூறியுள்ளார்.

அமெரிக்காவின் 6 மாகாணங்களில் வெள்ளி -சனிக்கிழமையன்று திடீர் சூறாவளி (டோர்னடோ) தாக்கி 90க்கும் மேற்பட்டோர் உயிரிழந்தனர். அந்த மாகாணங்களைப் புரட்டிப் போட்டு விட்டது இந்த சூறாவளி. இந்தத் தாக்குதல் குறித்து டீன் கிறிஸ்வெல் தற்போது சில கருத்துக்களைத் தெரிவித்துள்ளார்.

இதுகுறித்து அவர் கூறுகையில், மிக மிக மோசமான, பேரழிவை ஏற்படுத்தக் கூடிய புயல்கள் இனி இயல்பாக ஏற்படும். கால நிலை மாற்றமே இதற்கெல்லாம் முக்கியக் காரணம். இதுபோன்ற சூறாவளித் தாக்குதல்களையும் அடிக்கடி எதிர்கொள்ள வேண்டி வரும்.

காலநிலை மாற்றத்தால் புயல்கள், தீவிபத்துகள், வெள்ளப் பெருக்குகள் அடிக்கடி ஏற்படும் என பல வருடமாகவே சூழலியாளர்கள் எச்சரித்து வருகின்றனர். ஆனால் அதை யாரும் பெரிதாக எடுத்துக் கொள்வது போலத் தெரியவில்லை. அமெரிக்காவில் 6 மாகாணங்களில் ஏற்பட்ட இந்த திடீர் சூறாவளித் தாக்குதல் மக்களுக்கு பல உண்மைகளைப் புரிய வைத்திருக்கிறது. வெள்ளிக்கிழமை முதல் சனிக்கிழமை வரை அங்கு நடந்த சூறாவளித் தாக்குதலால் மக்கள் நிலைகுலைந்து போயுள்ளனர். இதுவரை 90க்கும் மேற்பட்டோர் இறந்துள்ளனர். அழிவு மிகப் பெரியதாக உள்ளது.

இது இயல்பாக இனி நடக்கப் போகிறது. காலநிலை மாற்றத்தின் பெரும் விளைவை நமது தலைமுறை பார்க்கத் தொடங்கியுள்ளது. மிக மிக மோசமான புயல்கள், மோசமான வானிலை, சூறாவளிகள், காட்டுத் தீ சம்பவங்களை இனி உலகம் அடிக்கடி பார்க்கும் என்றார் அவர்.

இதற்கிடையே, சமீபத்திய அமெரிக்க சூறாவளித் தாக்குதல், அந்த நாட்டு வரலாற்றிலேயே நீண்ட நேரம் நிலவிய சூறாவளி என்று பெயர் பெற்றுள்ளது. கிட்டத்தட்ட 2 நாட்கள் நிலவிய இந்த சூறாவளியால் 6 மாகாணங்களும் பெரும் சேதத்தை சந்தித்துள்ளன.

கிட்டத்தட்ட 30க்கும் மேற்பட்ட சூறாவளிகள் வெறியாட்டம் போட்டு விட்டன. மிசவுரி, டென்னஸ்ஸி, மிசிசிபி உள்ளிட்ட 6 மாநிலங்கள் இந்த சூறாவளிகளிடம் சிக்கி பெரும் சீரழிவை சந்தித்துள்ளன. இதுவரை இப்படிப்பட்ட சூறாவளித் தாக்குதலை நான் பார்த்ததே இல்லை என்று அமெரிக்கர்கள் அச்சத்துடன் கூறியுள்ளனர். ஆர்கன்சாஸ் முதல் கென்டகி வரை பேயாட்டம் போட்டுள்ளன இந்த சூறாவளிகள். கென்டகியில்தான் அதிக அளவில் பலியாகியுள்ளனர். அங்கு 60க்கும் மேற்பட்டோர் உயிரிழந்துள்ளதாக அஞ்சப்படுகிறது.

காலநிலை மாற்றத்தால் பூமி பல மோசமான விளைவுகளை சந்திக்கப் போவதாக விஞ்ஞானிகள், சுற்றுச்சூழலியல் நிபுணர்கள் தொடர்ந்து எச்சரித்து வருகின்றன. ஆனால் மனித குலம் அதை தவிர்க்கும் நடவடிக்கைகளில் இன்னும் மெத்தனமாகவே இருந்து வருகிறது என்பது குறிப்பிடத்தக்கது.



Source link

Share on Social Media

Leave a Reply

Your email address will not be published. Required fields are marked *