Share on Social Media


ஹைலைட்ஸ்:

  • இங்கிலாந்தில் 3 வது அலை ஓய்ந்த நிலையில் தற்போது ஓமைக்ரான் பரவல்.
  • ஓமைக்ரான் வேகமாக பரவுவதாக பிரதமர் ஜான்சன் தகவல்.
  • பூஸ்டர் ஊசி போட்டுக் கொள்ள மக்களுக்கு அறிவுறுத்தல்.

மிகப் பெரிய அலை போல ஓமைக்ரான் பரவ ஆரம்பித்துள்ளதாக இங்கிலாந்து பிரதமர் போரிஸ் ஜான்சன் கூறியுள்ளார். இதையடுத்து டிசம்பர் மாதத்துக்குள் 18வயதுக்கு மேற்பட்டோர் பூஸ்டர் டோஸ் போட்டுக் கொள்ள வேண்டும் என்றும் அவர் கெடு விதித்துள்ளார்.

இதுகுறித்து டிவி மூலம் அவர் உரையாற்றினார். போரிஸ் ஜான்சன் தனது உரையின்போது கூறுகையில், யாருக்கும் எந்த சந்தேகமும் வேண்டாம். பெரிய அலை போல பரவ ஆரம்பித்துள்ளது ஓமைக்ரான். விரைவில் இது நாடு முழுவதும் பரவி விடும். புதிய வகை கொரோனாவைரஸானது வேகமாக பரவ ஆரம்பித்துள்ளதாக மருத்துவ நிபுணர்களும் தெரிவித்துள்ளனர்.

ஓமைக்ரான் பரவலை அவசர நிலையாக அனைவரும் கருத வேண்டும். கடந்த கால அனுபவங்களிலிருந்து நாம் பாடம் கற்றுக் கொள்ள வேண்டும். ஓமைக்ரான் பரவல் வேகம் அதிகமாக உள்ளது. இது கவலைக்குரியது என்றார் போரிஸ் ஜான்சன்.

இங்கிலாந்தில் கடந்த ஜூன் மாதம்தான் 3வது அலையில் கொரோனா நன்றாக மட்டுப்பட்டது. புதிய கேஸ்கள் வருகை அடியோடு குறைந்தது. இதனால் பல்வேறு கட்டுப்பாடுகளை நீக்கத் தொடங்கியது இங்கிலாந்து அரசு. ஆனால் தற்போது ஓமைக்ரான் ரூபத்தில் இங்கிலாந்துக்கு மீண்டும் சிக்கல் வந்து விட்டது. சமுதாயப் பரவல் அளவுக்கு ஓமைக்ரான் பரவல் வந்து விட்டதாக மருத்து நிபுணர்கள் எச்சரித்துள்ளனர். டெல்டாவை விட வேகமாக ஓமைக்ரான் பரவுவதாகவும், அதேசமயம், தடுப்பூசி போட்டுக் கொண்டோருக்கு அறிகுறிகள் மைல்டாக இருப்பதாகவும் அவர்கள் கூறியுள்ளனர்.

பூஸ்டர் டோஸைப் பொறுத்தவரையில் பைசர் மற்றும் மாடர்னா பூஸ்டர் டோஸ்கள் நோய் எதிர்ப்பு சக்தியை அதிகரிப்பதாக கண்டறியப்பட்டுள்ளது. எனவே இந்த தடுப்பூசிகளை ஏற்கனவே செலுத்திக் கொண்டோர் பூஸ்டர் டோஸ் செலுத்துவதில் ஆர்வம் காட்டுவதாக கூறப்படுகிறது. அதேசமயம், ஆஸ்டிரஜெனகா தடுப்பூசியின் பூஸ்டர் டோஸும் கூட பாதிப்பை குறைப்பதாக சொல்லப்படுகிறது.

இங்கிலாந்தில் 18 வயதுக்கு மேற்பட்டோர் பூஸ்டர் ஊசிகளை போட்டுக் கொள்ளுமாறு உத்தரவிடப்பட்டுள்ளது. டிசம்பர் மாத கடைசிக்குள் இதை செய்ய வேண்டும் என்றும் கெடு விதிக்கப்பட்டுள்ளது. இதை உறுதிப்படுத்த நாடு முழுவதும் 42 ராணுவ குழுக்களையும் அரசு அனுப்பியுள்ளது. இவர்கள் பூஸ்டர் டோஸ் போடுவதைக் கண்காணிப்பார்கள். இதுதவிர பூஸ்டர் டோஸ் போடுவதற்காக கூடுதல் மையங்களையும் அரசு ஏற்படுத்தியுள்ளது. நடமாடும் மையங்களும் இதற்காக ஏற்படுத்தப்பட்டு வாரம் முழுவதும் இந்த மையங்கள் இயங்கும் என்றும் அறிவிக்கப்பட்டுள்ளது.

உலகம் முழுவதும் பரவிய கொரோனாவால் அதிக அளவில் பாதிப்பை சந்தித்த நாடுகளில் இங்கிலாந்தும் ஒன்று. இங்கு இதுவரை 1 லட்சத்து 46 ஆயிரம் பேர் கொரோனாவுக்குப் பலியாகியுள்ளனர். இதையடுத்து கடந்த ஆண்டு டிசம்பர் மாதத்திலிருந்து தடுப்பூசி போடுவதை விரைவுபடுத்தியது இங்கிலாந்து. இங்கிலாந்து முழுவதும் பொது வெளிகளில் உள்ள உள்ளரங்குகளில் நிகழ்ச்சிகளில் கலந்து கொள்வோருக்கு மாஸ்க் கட்டாயமாக்கப்பட்டுள்ளது. மேலும் வீடுகளிலிருந்தே பணியாற்றுவதை மக்கள் தொடர வேண்டும் என்றும் அரசு கேட்டுக் கொண்டுள்ளது.



Source link

Share on Social Media

Leave a Reply

Your email address will not be published. Required fields are marked *