Share on Social Media


ஹைலைட்ஸ்:

  • அன்டார்டிகாவில் பெரிய விமானம் தரையிறங்கியது இதுவே முதல் முறை.
  • விமானம் எந்த பிரச்சினையும் இன்று போய் விட்டுத் திரும்பியுள்ளது.
  • தென் ஆப்பிரிக்காவிலிருந்து இந்த விமான பயணம் மேற்கொள்ளப்பட்டது.

அன்டார்டிகாவில் ஒரு வரலாறு படைக்கப்பட்டுள்ளது. ஹைபிளை என்ற தனியார் விமானம் தனது ஏர்பஸ் ஏ340 விமானத்தை அன்டார்டிகாவில் இறக்கி சாதனை படைத்துள்ளது. அன்டார்டிகாவில் ஏர்பஸ் விமானம் ஒன்று தரையிறங்குவது இதுவே முதல் முறையாகும்.

தென் ஆப்பிரிக்காவின் கேப்டவுன் நகரிலிருந்து கேப்டன் கார்லோஸ் மிர்பூரி தலைமையிலான குழுவினர் இந்த பயணத்தை மேற்கொண்டனர். அன்டார்டிகா போய் விட்டு மீண்டும் கேப்டவுன் திரும்பியது இந்தக் குழு. இந்த பயணத்தின் மொத்த தூரம் 2500 கடல் மைல்கள் ஆகும். போக 5 மணி நேரம், வர 5 மணி நேரம் என மொத்தம் 10 மணி நேரம் ஆயுள்ளது.

இதுவரை அன்டார்டிகாவில் ஏர்பஸ் போன்ற பெரிய விமானங்கள் தரையிறங்கியதில்லை. தற்போது இறங்கியுள்ள விமானம்தான் முதல் பயணமாகும். இனி அடுத்தடுத்து சிறிய அளவில் சுற்றுலா பயணங்களை மேற்கொள்ளவுள்ளதாக ஹைபிளை நிறுவனம் அறிவித்துள்ளது. விஞ்ஞானிகள் குழுக்களின் பயணம், சரக்குகள் கையாளுதல் ஆகியவற்றையும் மேற்கொள்ளவுள்ளதாகவும் அது தெரிவித்துள்ளது.

ஏர்பஸ் ஏ340 ரக விமானம் மிகுந்த பாதுகாப்பு வசதிகளுடன் கூடியது. எனவே அன்டார்டிகா பயணத்திற்கு இந்த விமானத்தை தேர்வு செய்தனர். அன்டார்டிகாவில் நிலவும் அதீத சீதோஷ்ணத்தை கருத்தில் கொண்டு இந்த விமானம் தேர்வு செய்யப்பட்டது. 4 என்ஜின் கொண்ட விமானம் இது. இந்த பயணத்தில் எந்த சிக்கலும் ஏற்படவில்லை என்றும் வெற்றிகரமாக இருந்ததாகவும் ஹைபிளை நிறுவனம் தெரிவித்துள்ளது.

இந்த விமானம் தரையிறங்குவதற்காக ஒரு ரன்வேயும் தயார்படுத்தப்பட்டிருந்தது. அதிகாரப்பூர்வமாக இது விமான நிலையம் இல்லை என்றாலும் கூட இந்த விமானம் இறங்குவதற்கேற்ற வகையில் அந்த நிலப்பரப்பு சரி செய்யப்பட்டிருந்தது. அதில்தான் இந்த விமானம் பத்திரமாக தரையிறங்கியது. முற்றிலும் ஐஸ்களால் ஆன ரன்வேயில் விமானம் தரையிறங்குவதும், பின்பு டேக் ஆப் ஆவதும் மிகுந்த சவாலாக இருந்தது. இருப்பினும் எந்த பிரச்சினையும் ஏற்படவில்லையாம். கிட்டத்தட்ட 3000 மீட்டர் நீளம் கொண்டதாக ரன்வே அமைக்கப்பட்டிருந்தது.

அன்டார்டிகா

அன்டார்டிகாவுக்கு விமானங்கள் வருவது இது முதல் முறையல்ல. இதற்கு முன்பு 1928ம் ஆண்டு ஜார்ஜ் ஹியூபர்ட் வில்கின்ஸ் என்ற ஆஸ்திரேலிய நாட்டு பைலட் லாக்ஹீட் வேகா 1 மோனோபிளேன் என்ற விமானத்தை அன்டார்டிகாவில் தரையிறக்கினார். இதுதான் அன்டார்டிகாவுக்கு வந்த முதல் விமானம் ஆகும். அமெரிக்காவைச் சேர்ந்த மிகப் பெரும் பணக்காரரான வில்லியம் ரான்டால்ப் ஹியர்ஸ்ட் என்பவர் இந்த விமான பயணத்துக்கான முழுச் செலவையும் ஏற்றுக் கொண்டிருந்தார்.

அதன் பிறகு சிறிய ரக விமானங்கள் அவ்வப்போது இங்கு வந்து செல்வதுண்டு. பெரும்பாலும் விஞ்ஞானிகள் குழுக்கள்தான் இங்கு வருவது வழக்கம். இத்தனைக்கும் அன்டார்டிகாவில் விமான நிலையம் என்று எதுவும் இல்லை. இருப்பினும் விமானங்கள், ஹெலிகாப்டர்கள் போன்றவை தரையிறங்க வசதியாக 50 லேன்டிங் தளங்கள் மற்றும் ரன்வேக்கள் அமைக்கப்பட்டுள்ளன.

அன்டார்டிகாவில் மிகப் பெரிய விமானம் ஒன்று முதல் முறையாக வெற்றிகரமாக தரையிறங்கியுள்ளதால் இங்கு விமானப் போக்குவரத்து மேலும் அதிகரிக்கும், சுற்றுலா அதிகரிக்கும் வாய்ப்புகள் அதிகம் உள்ளதாக கருதப்படுகிறது. அன்டார்டிகா மட்டும்தான் கொஞ்சம் உருப்படியாக இருக்கு.. புவிவெப்பமயமாதலால் அதற்கும் கூட ஆபத்து இருப்பதாக விஞ்ஞானிகள் எச்சரித்து வருகின்றனர். இந்த நிலையில் இங்கு மக்கள் நடமாட்டம் அதிகரித்து விட்டால் நிலைமை இன்னும் மோசமாகலாம். காரணம், மனிதன் காலடி எடுத்து வைத்த எந்த இடமும் இன்று உருப்படியாக இல்லை என்பதால்!



Source link

Share on Social Media

Leave a Reply

Your email address will not be published. Required fields are marked *