Share on Social Media

பதிவு செய்த நாள்

31
ஜூலை
2021
20:11

புதுடில்லி:‘டெஸ்லா’ நிறுவனத்தின் தலைமை செயல் அதிகாரியான எலான் மஸ்க், ‘ஆப்பிள்’ நிறுவனத்தின் தலைமை பதவியை பிடிக்க முயற்சித்தார் என வெளிவந்த செய்தி பரபரப்பை ஏற்படுத்தி உள்ளது.

இந்நிலையில், இந்த செய்தி தவறானது என எலான் மஸ்க் தற்போது மறுத்துள்ளார்.‘வால் ஸ்ட்ரீட் ஜர்னல்’ பத்திரிகையின் நிருபர் டிம் ஹிக்கின்ஸ், டெஸ்லா மற்றும் எலான் மஸ்க் குறித்து, ‘பவர் பிளே’ எனும் புத்தகம் ஒன்றை எழுதியுள்ளார்.இப்புத்தகம் விரைவில் வெளிவர இருக்கிறது. அப்புத்தகத்தில் ஆப்பிள் நிறுவன தலைமை செயல் அதிகாரியாக வர, எலான் மஸ்க் முயற்சித்தது குறித்தும் எழுதப்பட்டு இருப்பதாக ஒரு செய்தி வெளியானது.

கடந்த 2016ல், டெஸ்லா நிறுவனத்தை, ஆப்பிள் கையகப்படுத்துவது குறித்து, தற்போதைய ஆப்பிள் நிறுவனத்தின் தலைமை செயல் அதிகாரியான டிம் குக், எலான் மஸ்க் உடன் பேசியதாகவும்; அப்போது எலான், ஆப்பிள் நிறுவனத்தின் தலைமை செயல் அதிகாரியாக வர விரும்புவதாக தெரிவித்ததாகவும், புத்தகத்தில் குறிப்பிடப்பட்டுள்ளதாக அச்செய்தியில் கூறப்பட்டிருந்தது.

இந்நிலையில், இதை எலான் மஸ்க் மறுத்துள்ளார். தானும், டிம் குக்கும் ஒருபோதும் தொலைபேசியில் பேசியதோ அல்லது எழுத்து பரிமாற்றமோ செய்ததில்லை என்று தெரிவித்துள்ளார்.அதேசமயம், ‘டெஸ்லாவை ஆப்பிள் வாங்கி கொள்வது குறித்து, டிம் குக் உடன் பேச விருப்பம் தெரிவித்திருந்தேன். எந்த நிபந்தனையையும் நான் விதிக்கவில்லை. ஆனால், டிம்குக் என்னுடன் பேச மறுத்துவிட்டார்’ என்றும் தெரிவித்துள்ளார்.

டெஸ்லா மாடல் 3 தயாரிப்பின் போது, மிக கடுமையான நெருக்கடிக்கு ஆளானார் எலான் மஸ்க். அப்போது, தற்போதைய மதிப்பில், 10ல் ஒரு பங்கு விலையில் நிறுவனத்தை கொடுத்துவிடும் முடிவில் இருந்தார் அவர் என்பது குறிப்பிடத்தக்கது.


Thanks for the Source

Share on Social Media

Leave a Reply

Your email address will not be published. Required fields are marked *