Share on Social Media


ராஜேந்திர சோழன் பிறந்தநாள் இனி அரசு விழாவாகக் கொண்டாடப்படும் எனத் தமிழ்நாடு முதலமைச்சர் மு.க. ஸ்டாலின் அறிவித்துள்ளார்.

பலரும் பாராட்டுகிறார்கள். உலகப் புகழ் பெற்ற ராஜராஜ சோழனின் மகனான ராஜேந்திர சோழனும் போற்றுதலுக்கு உரியவன். கங்கைகொண்ட சோழபுரம் என்ற புதிய நகரை உருவாக்கி, தஞ்சையில் ராஜராஜன் கட்டியதைப்போலவே, அங்கு பிரமாண்டமான பெருவுடையார் கோயிலை கட்டினார். இந்தியப் பெருநிலத்தில் மத்திய பிரதேசம் சட்டீஸ்கர், ஒரிசா வரை இருந்த எண்ணற்ற பகுதிகளை வென்றவர். அதோடு, கடல்கடந்து சென்று போரிட்டா மலேயா, சிங்கப்பூர் சுமத்ரா தீவுகள், கம்போடியா இந்தோனேசியா எனத் தென்கிழக்கு ஆசியா முழுவதும் சோழப் பேரரசை விரியச் செய்தவர். தெற்காசியப் பெருங்கண்டத்திலேயே அதிகப் பரப்பளவு கொண்ட நிலப்பரப்பினை வென்றெடுத்து ஆண்ட மாமன்னர். நிர்வாகச் சீர்திருத்தத்திலும் சிறந்து விளங்கினார் என்றெல்லாம் புகழ்கிறார்கள்.

அதே நேரம், மன்னராட்சி என்பதிலிருந்து நாகரீக வளர்ச்சியில், குடியரசு என்கிற நிலைக்கு வந்துவிட்டோம். இந்த நிலையில், மன்னர்களைப் போற்றி விழா எடுப்பது அவசியமா என்று சிலர் கேட்கிறார்கள். வரலாற்றை நினைவுகூர்வது தவறில்லை. ஆனால் வழிபாட்டு மனநிலையுடன் போற்றுதல் தேவையா என்ற குரலும் கேட்கவே செய்கிறது.

யாருடைய கோரிக்கை?

“ராஜேந்திர சோழன், ஆடி மாதம் திருவாதிரை அன்று பிறந்தவர். அன்று, அரசு விழாவாக கொண்டாட வேண்டும்” என நாம் தமிழர் கட்சியின் தலைமை ஒருங்கிணைப்பாளர், சீமான் கோரிக்கை வைத்தார்.
இதையடுத்து, ‘சீமான் கோரிக்கையை, மு.க.ஸ்டாலின் ஏற்றார்’ என்று சில ஊடகங்களில் தகவல் வெளியானது.
ஆனால், கடந்த பல ஆண்டுகளாகவே, ‘கங்கை கொண்ட சோழபுரம் மேம்பாட்டுக் குழுமம்’ என்ற அமைப்பு, ராஜேந்திரன் பிறந்த ஆடித் திருவாதிரை நட்சத்திரத்தன்று பெரும் விழா கொண்டாடிவருகிறது.
இந்த அமைப்பின் தலைவர் கோமகன், “2014ஆம் ஆண்டு முதல் ஆடித் திருவாதிரை விழாவைக் கொண்டாட ஆரம்பித்தோம். அது ராஜேந்திர சோழன் அரியணை ஏறி ஆயிரம் ஆண்டுகளை நிறைவு செய்த ஆண்டு. தஞ்சையிலிருந்து தொடர் தீபம் ஏந்திவந்து, கங்கை கொண்ட சோழபுரத்தில் ஆயிரம் பெரிய அகல் விளக்குகளில் தீபம் ஏற்றினோம். வருடந்தோறும் மூன்று நாள் விழா, கங்கை கொண்ட சோழபுரப் பெருவுடையாருக்கு மகாஅபிஷேகம், மதியம் அன்னதானம், மாலையில் கலாசார நிகழ்வுகள் என நடைபெறும்” என்கிறார்.
மேலும், ராஜராஜ சோழன் பிறந்த ஐப்பசி சதய நாள் அன்று தஞ்சையில் அரசு விழா நடக்கிறது. இதை ஆரம்பித்தவர், தமிழ்நாடு முன்னாள் முதலமைச்சர் கருணாநிதி. அதைப்போல, ராஜேந்திர சோழன் பிறந்த ஆடி திருவாதிரை நட்சத்திரத்தன்று அரசு விழா நடக்க வேண்டும் என்று 2016ஆம் ஆண்டே கோரிக்கை வைத்தோம். அப்போது அது நடக்கவில்லை. தி.மு.க. அரசு பதவியேற்றவுடன் தமிழ் வளர்ச்சி மற்றும் பண்பாட்டுத் துறை அமைச்சர் தங்கம் தென்னரசுவிடமும் கோரிக்கை வைத்தோம். தற்போது அது நடந்திருக்கிறது என்கிறார் கோமகன்.

ராஜேந்திர சோழன் எப்போது பிறந்தார்?

இதற்கிடையே, ராஜேந்திர சோழன் பிறந்தநாள் குறித்த சர்ச்சையும் வரலாற்று ஆய்வாளர்களிடையே ஏற்பட்டது.
ராஜேந்திர சோழன் பிறந்தது ஆடி மாதம் அல்ல., ‘சோழர் வரலாறு’என்ற நூலை எழுதிய கே.ஏ. நீலகண்ட சாஸ்திரியும், ‘பிற்காலச் சோழர் வரலாறு’ என்ற நூலை எழுதிய சதாசிவப் பண்டாரத்தாரும் முதலாம் ராஜேந்திர சோழனின் பிறந்த நாள் மார்கழி மாதத்து ஆதிரை என்று கூறியிருக்கிறார்கள்’ என்றனர்.
அதே நேரம், பல ஆராய்ச்சியாளர்கள், ‘பஞ்சவன் மாதேவீச்சரம், விருத்தாசலம், திருவொற்றியூர் ஆகிய பகுதிகளில் கிடைத்த கல்வெட்டுகளின் அடிப்படையில் ராஜேந்திர சோழன் பிறந்தது ஆதிரை நாளில் என்பது உறுதிப்பட்டது.

குறிப்பாக திருவொற்றியூர் கோயில் கல்வெட்டில், ‘சதுரானன பண்டிதர் என்பவர் அந்தக் கோயிலில் 150 காசுகளை முதலீடு செய்து, மார்கழித் திருவாதிரை நாள் விழா கொண்டாட ஏற்பாடு செய்தார்’ என்று இருக்கிறது. இதை வைத்தே, மார்கழி மாதம் திருவாதிரை நட்சத்திரத்தில் ராஜேந்திரன் பிறந்தார் என கணித்தனர்.

திருவாதிரை என்பது சிவபெருமானுக்கு உரியது. அன்று அங்கு விழா கொண்டாடப்பட்டது என்பதே அர்த்தம். அதற்கும் ராஜேந்திர சோழன் பிறந்தநாளுக்கும் தொடர்பில்லை. தவிர, மாதந்தோறும் வரும் திருவாதிரை நட்சத்திரத்தன்று, ‘ராஜேந்திர சோழன் திருநாள்’ என்ற பெயரில் கோயில்களில் கொண்டாடப்பட்டது.
அதே நேரம், திருவாரூரில் உள்ள வீதிவிடங்கப் பெருமான் திருக்கோயில் கல்வெட்டில் ராஜேந்திரனின் பிறந்தநாள் தெளிவாகக் குறிக்கப்பட்டுள்ளது. மாமன்னர் ராஜராஜன் ஐப்பசி மாதத்து சதய நாளிலும், அவருடைய மகன் ராஜேந்திரன் ஆடி மாதத்துத் திருவாதிரையிலும் பிறந்தவர் என்ற குறிப்பு. ஆகவே ராஜேந்திரன் பிறந்தது ஆடி திருவாதிரை நட்சத்திரத்தில்தான்’ என்கிறார். இந்த சர்ச்சை முடிந்தாலும், மேலும் இரண்டு கேள்விகள் உள்ளன.

நட்சத்திரக் கணக்கு எதற்கு?

ராஜராஜன், ராஜேந்திரன் ஆகியோரின் பிறந்த நாட்களைத் திமுக அரசு நட்சத்திரம் கொண்டுதான் விழா எடுக்க வேண்டுமா என்பது முதல் கேள்வி.

இதற்கு முக்கியக் காரணம் உள்ளது. திருவள்ளுவர் பிறந்தது, வைகாசி மாதம் அனுச நட்சத்திரத்தில்தான். ஆகவே அன்று அவரை கொண்டாடுவோம் எனத் தமிழறிஞர்கள் முடிவெடுத்து, 1935 மே 17,18 ஆகிய தேதிகளில், சென்னை பச்சையப்பன் கல்லூரியில் கொண்டாடினர். இதை முன்னெடுத்தவர்கள், மறைமலையடிகள், தெ.பொ.மீ, திரு.வி.க முதலான தமிழறிஞர்கள்.

இந்த நிலையில், கி.ஆ.பெ. விசுவநாதம் முதலிய தமிழறிஞர்கள், நட்சத்திரப்படி பிறந்தநாள் வேண்டாம் என தீர்மானித்தனர். தை முதல் நாள் தமிழ் ஆண்டு துவங்குவதாகவும் இதை திருவள்ளுவர் ஆண்டு என குறிப்பிட வேண்டும் எனவும் முடிவெடுத்தனர்.

தமிழ்நாட்டின் முதலமைச்சராக இருந்த கருணாநிதி, 1971இல் திருவள்ளுவர் ஆண்டு என்பதைத் தமிழ் நாட்டு அரசிதழில் வெளியிட்டார். இது 1972இல் நடைமுறைக்கும் வந்தது. 1981இல் மதுரை உலகத்தமிழ் மாநாட்டில், அப்போதைய முதலமைச்சர், எம்ஜிஆர், அதைச் சகல அரசு ஆவணங்களிலும் அலுவல்பூர்வமாகப் பயன்படுத்துவதற்கான அரசாணையைப் பிறப்பித்தார்.

நமது கேள்வி, திருவள்ளுவர் ஆண்டின்படி, ராஜராஜ சோழன், ராஜேந்திரசோழன் ஆகியோரது பிறந்த நாட்களை கொண்டாட முடியாதா என்பதுதான்.

தமிழ்ப் புத்தாண்டு என்பதை சித்திரை அல்ல, தை முதல்நாளே எனக் கொண்டு வந்தது திமுக அரசு.
‘திராவிட இனத்தைச் சார்ந்தவன்’ எனத் தன்னை அறிவித்துக்கொண்டுள்ள, மு.க.ஸ்டாலின், திருவள்ளுவர் ஆண்டின்படி, மன்னர்களின் பிறந்தநாளைக் கொண்டாட ஆவன செய்வாரா என்னும் கேள்வி பகுத்தறிவுப் பாதையைத் தேர்ந்துகொண்ட திராவிடச் சிந்தனையாளர்கள் மனதில் எழுகிறது.

மன்னராட்சிக் காலத்தில் பல நன்மைகள், சாதனைகள் நிகழ்ந்திருக்கலாம். அவற்றைப் போற்றிக் கொண்டாடுவதில் தவறில்லை. ஆனால், இன்றைய நவீன ஜனநாயக யுகத்தில் மன்னராட்சிக் கால விழுமியங்களை எந்த விமர்சனமும் இன்றிப் போற்றுவது எந்த அளவுக்குச் சரியானது என்னும் கேள்வியும் முக்கியமானது. புராண, இதிகாசங்களை விமர்சனபூர்வமாக அணுகும் நாம் வரலாற்றையும் வரலாற்றில் நாயகர்களாகப் போற்றப்படுபவர்களையும் அவ்வாறு அணுகுவதில்லை. அப்படி அணுகுபவர்களை இன விரோதியாகப் பார்க்கும் பழக்கமும் சிலருக்கு இருக்கிறது. விருப்பு வெறுப்பற்ற விமர்சனமும் அனைத்து மட்டங்களிலும் சமத்துவம் போன்ற விழுமியங்களும் நவீன அரசியலின் முக்கியக் கூறுகள். அனைத்தையும் கேள்விக்குட்படுத்தும் பகுத்தறிவை முன்னிறுத்தும் திராவிட இயக்கம் பண்டைய மன்னர்கள் விஷயத்திலும் அதைக் கடைப்பிடிக்க வேண்டும் என்னும் குரலுக்கும் ஆட்சியாளர்கள் செவிமடுக்க வேண்டும்.



Thanks for the source

Share on Social Media

Leave a Reply

Your email address will not be published. Required fields are marked *