Share on Social Media


லக்னோ: உத்தர பிரதேச மாநிலத்தில் அடுத்த ஆண்டு சட்டசபை தேர்தல் நடைபெற உள்ள நிலையில், பா.ஜ., பொது செயலர் பிஎல் சந்தோஷ், துணைத்தலைவர் ராதா மோகன் சிங் ஆகியோர் லக்னோவில் கட்சி நிர்வாகிகளுடன் ஆலோசனை நடத்தினர். இதன் பின்னர், முதல்வர் யோகி ஆதித்யநாத்தை அவரது வீட்டில் தனியாக சந்தித்து பேசினர். மாநில துணை முதல்வர்களுடனும் ஆலோசனை நடத்தினர்.

இந்த சந்திப்பு வழக்கமாக அமைப்பு ரீதியில் நடப்பது தான் என பா.ஜ., கூறியிருந்தாலும், சட்டசபை தேர்தல் காரணமாக இது முக்கியத்துவம் பெறுகிறது.

இது தொடர்பாக தகவல் அறிந்த வட்டாரங்கள் கூறுகையில், நிர்வாகிகளுடன் நடந்த சந்திப்பின் போது, அரசியல் கள நிலவரம் மற்றும் ஆட்சி மீதான மக்களின் எண்ணம் குறித்த கருத்துகளை, மேலிட தலைவர்கள் கேட்டறிந்தனர். மேலும், கட்சியில் உள்ள 6 பிராந்திய தலைவர்களான ஷேஷ் நாராயன் மிஸ்ரா, மன்வேந்திர சிங், மோகித் பெனிவல், மகேஷ் சந்திரஸ்ரீவஸ்தவா, தர்மேந்திர சிங் மற்றும் ரஜ்னிகாந்த் மகேஷ்வரி ஆகியோரிடமும் நிலவரங்களை கேட்டறிந்தனர். மேலும் மாநில அமைச்சர்கள் சிலரையும் தனித்தனியே சந்தித்தனர். சமீபத்தில் நடந்து முடிந்த உள்ளாட்சி தேர்தல் முடிவுகள் குறித்தும் இந்த கூட்டத்தில் ஆலோசனை நடத்தப்பட்டது.

இந்த கூட்டம் தொடர்பாக மாநில பொது செயலர் நாராயன் சுக்லா கூறுகையில், கொரோனாவால் பாதிக்கப்பட்டவர்களுக்கு உதவும் வகையில், நிர்வாகிகள் அதிகளவு மக்களை சந்திக்க வேண்டும். ஊரகம் மற்றும் நகர் பகுதிகளில் தடுப்பூசி போடும் பணிகளை வேகப்படுத்துவதற்காக மாநில அரசுகளுக்கு உதவ மேலிட தலைவர்கள் முடிவு செய்துள்ளனர். இவ்வாறு அவர் கூறினார்.

இந்த ஆலோசனை தொடர்பாக பா.ஜ., வெளியிட்ட அறிக்கையில், மாநிலம் முழுவதும் கட்சி சார்பில் செய்யப்பட்ட கொரோனா நிவாரண பணிகள் குறித்து சந்தோஷ் மற்றும் ராதாமோகன் சிங் ஆகியோர் ஆலோசனை நடத்தியதாக கூறப்பட்டு உள்ளது.

Advertisement



Source link

Share on Social Media

Leave a Reply

Your email address will not be published. Required fields are marked *