Share on Social Media


‘சிட்டுக்குருவி முத்தம் கொடுத்து சேர்ந்திடக் கண்டேனே

செவ்வானம் கடலலை மேல் கலந்திடக் கண்டேனே.’

என்று பாடி, சரோஜா தேவி தன் காதலை சிவாஜிக்குத் தெரிவிப்பார் ‘புதிய பறவை’யில்.

மறைந்த தமிழக முதலமைச்சர் ஜெயலலிதாவோ,

‘சிட்டுக்குருவிக்கென்ன கட்டுப்பாடு

தென்றலே உனக்கேது சொந்த வீடு’

என்று கூறி, தன் காதலை வெளிப்படுத்துவார் ‘சவாலே சமாளி’யில்.

‘முதல் மரியாதை’ சிவாஜி கணேசனோ, ஜோடியோட வந்து விட்டத்தில் கூடுகட்டச் சொல்லுவதுடன், ’பொண்டாட்டி இல்லை வந்து என்னோட பாடு.’

என்று சிட்டைத் துணைக்கழைப்பார்.

இப்படி ஏகப்பட்ட பாடல்கள் தமிழ்த் திரைப்படங்களில் சிட்டுக் குருவியை மையமாக வைத்துப் பாடப்பட்டுள்ளன.

காதலுக்கும், சுறுசுறுப்புக்கும், உற்சாகத்திற்கும் உறைவிடம் மட்டுமல்ல சிட்டுக்குருவி, உயர் விளைச்சல்பெறவும் அதன் உதவி இன்றியமையாதது. ஏற்கெனவே உலகில் தேனீக்கள் குறைந்து வருவதால், மகரந்தச்சேர்க்கை பாதிக்கப்பட்டு விளைச்சல் குறைவு ஏற்படுமென்று விஞ்ஞானிகள் எச்சரித்து வருகின்றனர். இந்த நேரத்தில் சிட்டுக் குருவிகளின் எண்ணிக்கையும் குறைய ஆரம்பித்தால், நம் விவசாயிகளின் உழைப்பைப் புழு, பூச்சிகள் மற்றும் வெட்டுக் கிளிகள் வீணாக்கி, விளைச்சலைக் குலைத்து விடும்.

வீடுகளிலும், விவசாய நிலங்களின் அருகிலும் சிட்டுக்குருவிகள் வாழ வகை செய்வோம். வீட்டில் கண்ணாடித்தொட்டியில் வளரும் மீன் நமக்கு மன அமைதியைத் தந்து, இதய நோயைக் குறைப்பதாக மருத்துவர்கள் தெரிவிக்கின்றனர். அதை விட அதிகமான மன அமைதியையும், உற்சாகத்தையும் சிட்டுக்குருவிகள் நமக்கு வழங்கி வருகின்றன என்பதே உண்மை. அவற்றின் வாழ்வுக்காக நாம் செய்வது செலவல்ல. மூலதனம். ஆம். அவை நம்மை அமைதிப்படுத்துவதுடன் நம் விளைச்சலையும் பெருக்கிப் பட்டினிச் சாவிலிருந்து நம்மைக் காப்பாற்றுவது உறுதி.

சிட்டுக்குருவி காப்போம். சிறகடிப்போம் உற்சாகத்தில்!

– ரெ.ஆத்மநாதன்,

மெர்லின், அமெரிக்கா



Source link

Share on Social Media

Leave a Reply

Your email address will not be published. Required fields are marked *